ماں کی نافرمانی اور مرگ الموت کا وقت

السلام علیکم ورحمۃ اللہ وبرکاتہ

سوال:

ایک واقعہ کچھ اس طرح پیش ہوا کہ جس میں بیان تھا کہ حضرت سیدنا عبداللہ بن ابواوفی رضی اللہ عنہ نے فرمایا ایک آدمی بارگاہ رسالت میں حاضر ہوا اور عرض کی یہاں ایک نوجوان کی موت کا وقت قریب ہے اسے کملہ پڑھنے کا کہا گیا ہے لیکن وہ نہیں پڑھ پارہا۔ آپ صلی اللہ علیہ وسلم نے پوچھا کیا وہ اپنی زندگی میں کلمہ نہیں پڑھتا تھا تو لوگوں نے عرض کی کیوں نہیں! ضرور پڑھتا تھا۔ ارشاد فرمایا تو پھر کس چیز نے اسے وقت مرگ کلمہ پڑھنے سے روک دیا؟ پھر آپ صلی اللہ علیہ وسلم اس نوجوان کے پاس تشریف لے گئے اور ارشاد فرمایا نوجوان لاالہ الا اللہ کہو، اس نے عرض کی میں یہ نہیں کہہ پا رہا۔ ارشاد فرمایا کیوں؟ عرض کی میں ماں کا نافرمان رہا ہوں، آپ نے پوچھا ماں زندہ ہے؟ اس نے عرض کی جی ہاں(چنانچہ اس کی والدہ کو بارگاہ نبوی میں حاضر کیا گیا) آپ صلی اللہ علیہ وسلم نے اس سے فرمایا یہ تمہارا بیٹا ہے؟ اس نے عرض کی جی ہاں، ارشاد فرمایا اگر ایک زبردست آگ جلائی جائے اور تم سے کہا جائے کہ اگر تم راضی نہ ہوئیں تو اس نوجوان کو آگ میں ڈال دیں گے تو تم کیا کروگی؟ وہ عرض گزار ہوئی پھر تو میں اسے معاف کردونگی۔ ارشاد فرمایا۔ پھر تم اللہ اور ہمیں گواہ بناکر کہو کہ تم اس سے راضی ہو۔ اس نے عرض کی میں اپنے بیٹے سے راضی ہوں، پھر سرکارنامدار صلی اللہ علیہ وسلم نے اس نوجوان سے فرمایا۔ لاالہ الا اللہ کہو، اس نے لا الہ الا اللہ کہا تو آپ صلی اللہ علیہ وسلم نے اللہ تعالیٰ کی حمد ان الفا ظ کے ساتھ بیان کی ’’الْحَمْدُ لِلَّهِ الَّذِي أَنْقَذَهُ مِنَ النَّارِ‘‘ یعنی تمام تعریفیں اس خداکےلیے ہیں جس نے میرے طفیل اسے جہنم سے بچالیا۔
بہن نے اس پر سوال کیا ہے کہ کیا یہ واقعہ درست ہے؟