عقیدۃ وحدۃ الوجود اور دین اسلام

سوال

السلام علیکم ورحمۃ اللہ وبرکاتہ

سوال:

بہن نے سوال کیا ہے کہ عقیدہ وحدۃ الوجود کیا ہے؟ اور ہمارا دین اس بارے میں کیا کہتا ہے۔؟

353 مناظر 0

جواب ( 1 )

  1. Taleem un Nisa
    0
    2017-01-20T02:41:39+00:00
    جواب دیں

    جواب:

    بہن! عقیدۃ وحدۃ الوجود ایک صوفیانہ عقیدہ ہے جس کی رو سے جو کچھ اس دنیا میں نظر آتا ہے وہ خالق حقیقی کی ہی مختلف شکلیں ہیں اور خالق حقیقی کے وجود کا ایک حصہ ہے۔ اس عقیدے کا اسلام کی اساس سے کوئی تعلق نہیں، قرآن وحدیث میں اس کا کوئی حوالہ نہیں ملتا اور اکثر مسلمان علماء اس عقیدے کو ناپسندیدگی کی نظر سے دیکھتے ہیں۔

    چونکہ اس عقیدے کی ابتدا مسلم صوفیا کے یہاں سے ہوئی اس لیے اسے اسلام سے متعلق سمجھا جاتا ہے۔

    مولانا اقبال کیلانی نے ایک کتاب ’’ شریعت وطریقت‘‘ لکھی، جس میں صوفیا کرام کے اس طرح کے باطل عقائد کا رد کیا، جس کے صفحہ نمبر63 پر لکھتے ہیں، جس کی تفصیل ووضاحت یہ ہے کہ

    ’’ بعض لوگ یہ عقیدہ رکھتے ہیں کہ انسان عبادت وریاضت کے ذریعے اس مقام پر پہنچ جاتا ہے کہ اسے کائنات کی ہر چیز میں اللہ نظر آنے لگتا ہے یا وہ ہر چیز کو اللہ کی ذات کا جزء سمجھنے لگتا ہےاس عقیدے کو وحدۃ الوجود کہاجاتا ہے۔ عبادت اور ریاضت میں ترقی کرنے کے بعد انسان اللہ کی ہستی میں مدغم ہوجاتا ہے، اور وہ دونوں(خدا اور انسان) ایک ہوجاتے ہیں،اس عقیدے کو وحدۃ الشہود یا فنا فی اللہ کہاجاتا ہے،عبادت اور ریاضت میں مزید ترقی سے انسان کا آئینہ دل اس قدر لطیف اور صاف ہوجاتاہے کہ اللہ کی ذات خود اس انسان میں داخل ہوجاتی ہے جسے حلول کہا جاتا ہے۔‘‘

    ان تینوں اصطلاحات کے الفاظ میں کچھ نہ کچھ فرق ضرور ہے لیکن نتیجہ کے اعتبار سے ان میں کوئی فرق نہیں اور وہ یہ ہے کہ انسان اللہ کی ذات کا جزء اور حصہ ہے یہ عقیدہ ہرزمانے میں کسی نہ کسی شکل میں موجود رہا، ہندومت کے عقیدہ اوتار بدھ مت کے عقیدہ نرواں اور جین مت کے ہاں بت پرستی کی بنیاد یہی فلسفہ وحدت الوجود اور حلول ہے۔ یہودی اسی فلسفہ حلول کے تحت عزیر علیہ السلام کواور عیسائی عیسی علیہ السلام کو اللہ کا بیٹا(جزء)قراردیتے ہیں۔

    مولانا عبد الرحمن کیلانی مزید لکھتے ہیں جس کی تفصیل ووضاحت یہ ہے کہ

    ’’انسان چلہ کشی اور ریاضتوں کے ذریعہ اس مقام پر پہنچ جاتاہے کہ اسے کائنات کی ہر چیز میں خدا نظر آنے لگتا ہے، بلکہ وہ ہر چیز کو خدا کی ذات کا حصہ سمجھنے لگتاہے، اس قدر مشترک کے لحاظ سے ایک بدکار انسان اور ایک بزرگ، ایک درخت اور ایک بچھو، لہلہاتے باغ اور ایک غلاظت کا ڈھیر سب برابر ہوتے ہیں، کیونکہ ان سب میں خدا موجود ہے۔ ‘‘

    اسی طرح ایک کتاب ’’ اہل تصوف کی کارستانیاں ‘‘ شیخ عبدالرحمٰن عبدالخالق کی تصنیف ہے، جس میں وہ فرماتے ہیں کہ

    ’’ اللہ کے بارے میں اہل تصوف کے مختلف عقیدے ہیں۔ ایک عقیدہ حلول کا ہے،یعنی اللہ اپنی کسی مخلوق میں اترآتا ہے، یہ حلاج صوفی کا عقیدہ تھا۔ ایک عقیدہ وحدت الوجود کا ہے یعنی خالق مخلوق جدا نہیں، یہ عقیدہ تیسری صدی سے لے کر موجودہ زمانہ تک رائج رہا، اور آخر میں اسی پر تمام اہل تصوف کا اتفاق ہوگیا ہے۔ اس عقیدے کے چوٹی کے حضرات میں ابن عربی، ابن سبعین، تلمسانی، عبد الکریم جیلی، عبد الغنی نابلسی ہیں۔ اور جدید طرق تصوف کے افراد بھی اسی پر کاربند ہیں ‘‘۔

    واللہ اعلم بالصواب

ایک جواب چھوڑیں